अमेरिकेतील उत्तर कॅरोलिना राज्य विद्यापीठातील संशोधक थॉमस सिंक्लेअर आणि सहकाऱ्यांनी भुईमुगातील पाण्याचा नेमकेपणाने वापर करणाऱ्या जातींचा शोध घेतला आहे. या जाती दुष्काळाच्या स्थितीमध्येही चांगले उत्पादन देण्यामध्ये सक्षम आहेत. भुईमूग पीक हे वालुकामय जमिनीत, अधिक ओलावा नसतानाही चांगले वाढते. मात्र, काही जाती दुष्काळाच्या स्थितीमध्येही चांगल्या प्रकारे वाढतात. मुळाच्या अवतीभवती पाण्याची कमतरता असताना या जाती पाणी कमी वापरतात. या सर्व बाबींचा उत्तर कॅरोलिना राज्य विद्यापीठामध्ये बारकाईने अभ्यास करण्यात येत असून, दुष्काळामध्ये चांगल्या प्रकारे उत्पादन देणाऱ्या जाती शोधण्यात येत आहेत. याविषयी माहिती देताना थॉमस सिंक्लेअर यांनी सांगितले, की कमी पाण्यातही अधिक उत्पादन देणाऱ्या जाती भविष्यामध्ये शेतकऱ्यांसाठी फायद्याच्या राहणार आहेत. वातावरणातील बदलामुळे पाऊस अनियमित होत असून, त्याचा फटका विविध पिकांना बसत आहे. ज्यावेळी जमीन कोरडी होत जाते, त्या वेळी भुईमूग वनस्पती आपले बाष्पोत्सर्जन कमी करते. त्यातून ती कमी पाण्याच्या स्थितीमध्येही चांगल्या प्रकारे तग धरू शकते. पिकाच्या सुरवातीच्या स्थितीमध्ये जमिनीतील आर्द्रता कमी असल्याची स्थिती झाल्यास पुढे येणाऱ्या दुष्काळासाठी वनस्पती पाणी साठवून ठेवण्यास सुरवात करत असल्याचे दिसून आले आहे.   संशोधकांनी भुईमुगाच्या जलसंवर्धन तंत्राच्या गुणधर्मांचा अभ्यास केला. त्यासाठी त्यांनी तीन प्रयोग केले.